Үлкенге құрмет көрсетуде орманшылар салтынан жаңылған емес. Халықаралық Қарттар күнінде «Семей орманы» мемлекеттік орман табиғи резерватының қызметкерлері орман саласының ардагерлерін мерекелерімен құттықтады. Орман шаруашылығын дамытуға барынша үлес қосқан зейнеткерлердің бәрін үйлеріне барып құттықтап, хал-жағдайларын біліп, көкірегі өсиетке толы қариялармен әңгіме-дүкен құрып қайтты. Өйткені көпті көрген көнекөздердің ақылын тыңдап, сөзін санаға түйіп жүргеннен ешкім жаман болмаған.

   -Бүгін – Халықаралық Қарттар күні. Сіздер осы салада талай жасты тәрбиелеп, ізбасарларыңызды өсірдіңіздер. Бүкіл саналы ғұмырларыңызды осы салаға арнап, орман шаруашылығына зор үлес қостыңыздар. Ендеше, соңдарыңыздан ерген біздерге игілік пен ізгіліктің, пайым-парасаттың үлгісін көрсетіп, ортамызда жасай беріңіздер! Мерекелеріңіз құтты болсын!- деп ізгі тілектерін білдірген резерват қызметкерлеріне ақжарма тілектерін айтып,ақ баталарын беріп жатты. Алды 80-нің сеңгіріне шығып 90-ға тақаса, соңы 70-тен асқан зейнеткерлер құттықтай келген ізбасарларына шын көңілден ризашылықтарын білдірді.

Өз тілшімізден